國學大師饒宗頤學貫中西，康文署同香港大學亦特別趁饒老百歲華誕，喺香港中央圖書館舉辦「香江藝韻—饒宗頤教授百歲學藝展」，展出饒老逾百件精選作品。據知今次係香港歷年有關饒公作品展中，最具規模以及展品種類最齊全嘅一次。
展覽噚日舉行開幕禮，特首梁振英夫婦、全國政協副主席董建華以及中聯辦副主任殷曉靜等都有出席；政務司司長林鄭月娥喺致辭期間提到，饒公博古通今，治學精神值得崇敬，透露過去幾年有多次機會得到佢老人家親自教誨；雖然近年拜會饒公嘅機會唔多，但每日都受到饒公嘅鼓勵同支持，典解？因為林鄭話辦公室掛住饒公5年前送畀佢嘅四個字：「貞固幹事」，提醒自己要守持正道、堅定不移，咁先能夠成事喎。展覽即日起至12月8日免費入場。