之前為《蘋果》客串過做記者嘅男神王宗堯，噚日孭住部「大機」喺立法會外現身，唔通真係做上癮？係真唔係呀？但一切都係八方諗多咗，皆因男神不過係拍戲咋，不過連佢都估唔到，同「流X華」會有場對手戲。
八方同事噚日下午喺立法會外採訪期間，撞見男神王宗堯，當時佢孭住部大相機，拍緊《導火新聞線》電影版。除咗戲中飾演「輝爺」嘅王宗堯，附近仲有一班臨記示威者，高喊「爭取標準工時」口號，真係好似示威緊㗎！咁又係，邊一行唔想要標準工時吖！
嘆對手太沉默
原來噚日係《導》片首日開拍，男神朝早喺西環拍攝時已經玩facebook直播，訪問電影編審潘漫紅。潘漫紅話拍攝進度可以，相信會越拍越好，男神就希望套戲快啲有得睇喎！
而男神喺立法會門外嘅戲份，由下晝3點拍到晚上8點，其間傍住垃圾桶「打邊爐」，仲有感而發，喺fb留言話，有幸同「流X華」做對手戲，可惜呢個對手，「依然沉默寡言」！唔知真嘅民政事務局局長劉江華，有冇興趣邀約男神做場大龍鳳呢？
李八方
mailto:[email protected]