上星期日早上，正忙於刨馬，專心研究新亞校友賽馬團體隻「一片光明」當日有冇機會贏馬，是否有能力砌贏隻一面倒大熱門「發盈喜」。睇牌面，「發盈喜」初升第三班，負129磅，排11檔跑千二米，應該係蝕底啲嘅，「一片光明」係三歲馬，只受讓一磅，即係攞唔到着數，但排第二檔靚檔，慳晒位，「發盈喜」自外檔殺入內欄，入直路鬥衝一段，勝負難料。唉，紙上理論係得個講字箒，事後賽果證明，上述全是幻想，隻「發盈喜」贏馬跑出一分零八秒七六時間，根本係三級賽標準時間，有資格做「友瑩格」接班馬，「一片光明」加對翼都唔會追得到佢，講跑馬，實踐是體驗真理的唯一標準，隻馬係叻嘅話，負磅與檔位完全不是問題。我地平日處理日常事務，亦作如是觀，叻人就係多啲選項，唔會俾特定條件限死自己嘅。
除非啦，叻人除非係俾特首睇中，為佢賣命出力，先至會搞到自己進退兩難。當日刨馬刨到入神之時，一個WhatsApp群組不斷有短訊，iPhone係咁響，搞邊科呀？原來係組內幾位港大老友傳來傳去，話要返港大投票，反對李國章做港大校委會主席。呢幾位港大老鬼老友，平時已不問世事，退休享福，尤其是係財務V，平時喺東莞高爾夫球場搵佢，容易過上陸羽，點會突然間老馬有火，周圍叫人返港大畢業生議會投票㗎？佢地幾位愈講愈㷫，居然寫上「百年老店，豈容沉淪」，財務V更聲言：「港大興亡，匹夫有責！」於是佢地幾位齊齊坐地鐵返港大排隊投票。其實財務V已經畢業50年，周末甘心放棄北上打波而走返母校，真係用心良苦。怪唔之得當日有4454人投票，其中4356人支持議案（李國章不適合接任校委會主席），25人反對，票數對比如此懸殊，即係話港大校友幾乎一致反李，李國章堂堂權威教授，前中大校長，仲好意思去接下梁智鴻嘅火棒？佢來自香港藍血家庭，平日威慣，點吞得下呢口氣呀？有幾位中大校友對李國章好同情，認為令佢陷入僵局嘅，就係CY。假如CY早在六七月已委任佢為候任港大校委會主席，便冇今天咁尷尬，上任後俾人要求下台，與上任前俾港大校友反對，中間係有分別嘅。梁先生處事有勇無謀，務求除陳文敏而後快，手段粗糙，現在如何是好？委任李國章就係向港大校友宣戰，不委任就威信盡失，唔通臨時拉夫，搵第二個捱義氣？