中原地產創辦人施永青呢個月開始做番主席，唔知係咪工作繁重，太累了，佢噚日出席一個環保頒獎典禮做頒獎嘉賓，喺台下聽緊一班得獎企業車輪式分享環保工作時，竟然忍唔住要眠一眠，或者係閉目養神喇。
施老闆聽人講環保就眼瞓，但係一提到樓市就即刻醒神晒，仲要有計仔獻畀政府。
佢話民意調查反映，市民認為政府應該協助市民買樓，佢都認同，但唔贊成政府用現金補貼市民去置業，政府可以透過土地政策，令更多人有條件買樓，例如每年批地，有一定比例，規定賣畀首次置業嘅香港人，呢類物業嘅呎數唔好太大，一戶500平方呎，仲要訂明唔可以出租，只能自用，轉讓時都要賣畀首置人士。