高路普嘅利物浦再次令利迷振奮！繼早前輕取車路士同大勝曼城之後，紅軍禮拜三晚喺英聯盃八強以6:1狂炒修咸頓，打入四強，將會面對史篤城。高路普離加盟後嘅首個獎盃只差三場比賽，而今場交出兩個助攻嘅艾拔圖摩蘭奴仲話，球隊保持呢個勢，英超冠軍不是夢。
奧歷治中三元反吸6:1
利物浦呢場作客修咸頓，開頭係較慢熱，被對手嘅沙迪奧文尼一分鐘先開紀錄，所以高路普賽後都鬧一鬧班球員，「第一分鐘，我哋出現問題，喺之後嘅10分鐘，問題都冇少到，之後我哋啲狀態先慢慢返嚟，真係唔易捱。」等高路普嘅紅軍企穩陣腳，修咸頓大鑊嘞！復出後首次踢正選嘅史杜列治交到功課，分別喺25同29分鐘各入一球，幫利物浦反先2:1。之後，輪到比利時前鋒奧歷治威水，個人大演帽子戲法，同埋後備上陣嘅佐敦伊比都整番球，幫利物浦大勝修咸頓6:1！
奪冠次熱 四強遇史篤城
利物浦一場入六球，真係好耐都冇試過，上次已經係年半前嘅英超，作客大炒卡迪夫城6:3，嗰陣蘇亞雷斯都未走，仲射入三球㖭。不過，有高路普喺度，利迷唔需要再懷緬過去，自從呢位德國主帥上任後，球隊11場比賽只係輸咗一場，同埋最近四場全勝。𠵱家利物浦打入英聯盃四強，下圈對手只係史篤城，至於另一場四強就係愛華頓對曼城；兩回合嘅四強比賽會喺出年一月踢。睇番足智彩嘅冠軍賠率，利物浦以2.5倍列為次熱，僅次1.82倍嘅曼城。
利物浦呢排個勢咁強，球員都開始心雄，西班牙左閘艾拔圖摩蘭奴話，紅軍都有機會爭今季英超冠軍，「𠵱家，我哋開始諗爭聯賽錦標，一來我哋氣勢如虹，二來前面啲爭標對手係咁失分，利物浦拎英超冠軍，唔係冇可能。我冇話百份百拎到，我想講我哋已經準備去逐鹿英超。」紅軍暫排英超第六，落後第四位嘅阿仙奴四分，差榜首曼城就六分。
