香港唔少人膽生毛，最鍾意「毛」事生非，最近一班建築、工程及測量等界別年輕人士都「毛」中生有，「毛情情」舉辦送暖大行動，籲各界20號前捐贈毛衣等禦寒物品，轉送有需要人士，「有毛出毛、無毛出力」。
活動發起組織係「躍動菁專（LEAPS）」（圖），創會成員之一嘅鄧亦庭話，有興趣捐毛嘅有心人留低聯絡方法後，會有專人直接聯絡，並約定交收地點，「通常我哋邊個成員近，就邊個負責去收。」
佢哋聯絡緊NGO睇吓可唔可以幫忙分發毛衣；而24號平安夜當日朝早，佢哋會到深水埗等地區派毛衣畀露宿者。雖然活動主打毛，但其他質地厚衣一律唔拘，最緊要乾淨同無爛。相信大家都唔係一「毛」不拔嘅人，有意者可電郵至LEAPS查詢（mailto:[email protected]）。