美滙指數因市場憧憬加息而升到12年高位，好多人都寄望隨住美國進入加息周期，美元會繼續升，去旅行揸港紙會更見使。不過筆者翻查之前40年合共6次加息周期，發覺首次加息後，美元短線其實唔一定會升。
美國過往40年嘅6次加息周期，啟動時間分別係1977年2月、1983年3月、1987年2月、1994年2月、1999年7月同埋2004年6月。當中只有1983年嗰次，美滙指數喺加息後三個月係上升，至於喺2004年嘅加息周期展開後，則呈橫行格局，其餘4次加息周期啟動後，美滙都係下跌而唔係上升。
雖然美元未必會喺加息之後即刻上升，但加息後美元走強嘅講法係冇錯，因為即使美元喺加息後下跌或橫行，一段時間後都會轉升。好似1999年7月嘅一次加息周期，加息後美滙跌足三個月先開始升；又例如2004年6月嗰次加息，美滙經歷過半年嘅橫行同埋下跌之後，先至見底回升。
講返美滙本輪升浪，由2011年5月已經開始，去年7月起更加展開凌厲升勢，所以喺聯儲局正式宣佈加息後抖抖並唔出奇。短線美滙未必繼續向上，但由於技術上美滙去年已經升穿咗三十多年嘅阻力，筆者相信美元呢輪大牛市，應該有排都未完。
美元走強當然不利作為新興市場之一嘅港股，但有辣有唔辣。美元上升意味其他非美貨幣滙率相對弱，由於港元同美元掛鈎，揸住港元嘅我哋，喺國際上嘅購買力亦會相應增加，所以未來幾年相信會係港人外遊嘅黃金時期，大家可以趁呢幾年環遊世界。不過調返轉睇，接下來幾年亦會係香港旅遊業嘅低潮。
El.
本欄逢周二、四、五刊出