香港興業（480）副主席查懋成嘅公子查燿中（Benjamin），今年41歲，自從兩年前辭任香港興業執行董事一職，暫時脫離家族生意後，舊年就加入英資地產商高富諾，今年4月仲升為集團亞太區行政總裁，睇晒香港、中國同日本地區業務。噚日Benjamin係升職後首次見傳媒，由於佢自細喺美國讀書，自嘲中文水平係「有限公司」，但都堅持用廣東話同記者傾偈。佢亦因為自己中文差，唔想仔女唔識中文，所以特登送兩個仔入讀私立小學聖士提反書院附屬小學，並非入讀國際學校。佢希望兩個仔可以學好中文，可以教番佢咁話。