民建聯葛珮帆（EQ）失落區選議席後，被黨友象哥黃定光笑佢經常去非洲睇大象，最終「救到我（象）但救唔到自己」。
葛博士噚日懶理黨友恥笑，繼續提出要求政府打擊走私野生動物議案，象哥似乎想趁機𠱁番黨友，一開場就多謝EQ提出相關議案（圖），仲改寸公民黨毛孟靜。事緣Miss Mo喺修正案中，批特首梁振英上任前曾承諾向北京提案跟進熊受虐問題，但至今一直走數，象哥質疑「係又梁振英，唔係又梁振英，呢啲抽水兼借題發揮嘅作為，我係實在不敢恭維」。多名泛民睇唔過眼幫Miss Mo還拖，長毛話Miss Mo只係講出CY唔做嘢嘅客觀事實。
拗完一輪，立法會最終通過葛、毛議案，但政府回應就繼續hea，只話對增加罰則「持開放態度」喎。