練馬師沈集成不愧為新快活谷之王，谷戰表現硬淨到癲，這晚只出三駒，眼看佢有機會斷纜之際，第六場三班2200米有隻「凱倫之寶」幫佢力挽在瀾，此駒因雷神停賽而換楊明綸，跑落一啲都唔失禮，留到最後200米左右後上一攻而破，五歲馬開出5.6倍綠燈Win，並幫自己同馬主一併打開今季勝門，組合獨贏開番A2派23.5元，楊明綸停賽復出後首度建功，沈廐更強勢宣告在季內已舉行的十次谷戰，統統有馬贏未斷纜，威過威士忌！
「凱倫之寶」前季兩捷，上季食白果，今次重開勝門，馬主李澄曜以愛妻Helen之名，為愛駒命名為「凱倫」，反映佢深愛老婆，而Helen正正就係抹茶屋「京林屋」的總廚，不知她是否要看舖，這晚她未見現身，但李澄曜就在看台嗌馬，嗌到好興奮。
呢場跑第二係李易達同柏寶合作馬「其樂無窮」，三、四名分別係「勁新鮮」及「凱明神駒」，四重彩派三萬一千幾。其中「勁新鮮」係板長壽司老闆鄭威濤名下馬，他與Helen兩位飲食界馬主，幾乎食Q成為一時佳話。這晚三T有人中正獎，每注派二萬九千幾。