《MAMA》昨晚於亞博館舉行，昨早先舉行記者會，不過今次大會為方便韓國傳媒，要求嘉賓一律以韓文作答，並只安排了英文繙譯，令識講廣東話的男團GOT7香港成員Jackson成功搶鏡。
Jackson出場時先狂整心心手勢，當攝記用廣東話要求畀多個心心甫士時，Jackson即以廣東話回應：「畀多個你，掂未掂未？」令全場大笑。而Jackson用完韓文後再用廣東話自我介紹：「嚟香港見大家感到好光榮，會準備特別舞台畀大家。」透露是次回港有叫成員一齊返屋企瞓，之後又叫成員講「香港加油」，非常識做。另外，「馬舞女」泫雅在記招上罕有地上身包到冚，未有晒事業線，僅以短裙上陣騷長腿。
採訪：黎嘉穎
攝影：沈健程