上周六喺非洲國家毛里塔尼亞舉行嘅超級盃決賽由ACS喀薩對FC特弗拉戈，出現咗驚人一幕。歐洲有傳媒報道，當賽事進行到63分鐘，兩隊仲係1:1嗰陣，當地總統艾戴爾阿斯斯（Mohamed Ould Abdel Aziz、箭嘴示）嫌場波太悶，決定腰斬比賽，即刻改以互射12碼分勝負，最終由特弗拉戈勝出。呢位總統真係勁過電影《少林足球》入面由謝賢飾演嘅強雄，因為連足總主席事後，都要幫佢維持形象！該國足總賽後就發表聲明死撐，話當日係毛里塔尼亞獨立55周年，總統啲行程勁緊密，如果場波要踢到加時，佢就可能趕唔切頒獎畀球員，所以兩軍教練同總統先同意腰斬比賽。呢次決定係唔係「一男子」話晒事，就真係信不信由你喇。事後有網民話，其實個總統都算幾文明，如果佢係總統就會直接揀邊隊贏，仲有人話既然呢個係人治社會，明知總統多嘢做應該事先安排好賽果。