澳洲好手柏寶雖未做過香港冠軍騎師，但佢嘅騎功，相信冇乜人懷疑；佢亦係練馬師蘇偉賢嘅好柏檔，單係今季兩人就合作攞到3冠4亞3季成績，啱啱禮拜日柏寶就策騎一匹賢廐馬，陳慧琳老竇陳崇偉嘅愛駒「神威福將」，爆12倍冷win。
不過，所謂強中自有強中手，有能力搶走柏寶座騎嘅騎師，大家都應該估到係邊個。嚟緊禮拜日(6日)賽事，賢廐「幸運明星」正式飛起柏寶，易配停賽復出的雷神。話說呢匹馬上仗喺柏寶胯下，本來大有勝望，但末段受空馬「紅運精彩」干擾導致勒避，「幸運明星」就咁熱門跑梗頸四，周日再出將帥權拱手讓畀雷神。
有人話可能係柏寶揀騎同場「皇龍大將」，但其實無論點都好，如果「幸運明星」雷神贏到，他日柏寶想搶番唔係咁易，冇一個騎師會樂見自己座騎落入雷神手上，柏寶唔肉赤就假。況且就算真係柏寶揀「皇龍大將」，但因此間接造就「幸運明星」用雷神，令後駒戰鬥力更強，「皇龍大將」今仗分分鐘就死喺「幸運明星」手上，怎說雷神都係得益者，因為始終取得一匹具實力的新座騎「幸運明星」。
睇番「幸運明星」，已經由雷神過檔，上月下旬試大閘得季軍，走勢相當好，狀態有進冇退。呢匹馬三度喺沙田1000米直路賽入Q，路有專長，今次再爭同一路程，好大機會開齋。