加利佬教華倫西亞？我求大俠都嚇到彈起，一個近乎零執教經驗嘅英格蘭教練，竟然去教西甲傳統勁旅「蝙蝠軍團」，唔通華倫班主林榮福聽得加利佬講波多，見佢講得頭頭是道就搵佢嚟教？
首仗即出戰歐聯
華倫日前炒咗教練紐奴，噚日就公佈咗一個震驚球壇嘅消息，宣佈委任英格蘭助教加利尼維利做主帥，直至季尾。加利佬會辭咗講波佬份工，同𠵱家做緊華倫助教嘅細佬菲臘尼維利拍住上，兩兄弟一齊教波。據華倫份聲明所講，加利佬嚟緊嘅周日先至上任，第一場帶領嘅比賽，會係下周三主場對里昂嘅歐聯，至於本周末華倫主場對巴塞隆拿場大波，都係由暫代教頭禾路帶隊。
我求大俠唔係睇小加利佬，但佢掛咗靴之後都係全職講波，兼職做英格蘭國家隊助教，從未坐正做過球隊主帥。
同埋，因為言語不通、文化唔同，英國教頭喺西班牙冇咩成功例子，就連喺英超身經百戰嘅莫耶斯，去到教中游嘅皇家蘇斯達都被炒收場。以加利佬嘅經驗同級數，真係懷疑佢教唔教得掂！我求大俠聽聞華倫班主林榮福之前想收購曼聯，但買唔成，唔通佢𠵱家想儲齊「曼聯92班」喺教練團度，一圓自己心願？
講起「曼聯92班」，由傑斯、史高斯、畢特同尼維利兄弟做班主嘅沙福特城，聽日有場重要比賽，出戰英足盃次圈主場鬥哈特普爾。華倫正喺新舊主帥交替期，相信菲臘仔喺西班牙都忙到一頭煙，至於加利佬應該都忙住執行李準備上任，睇嚟佢兩兄弟都唔得閒睇沙城場波。
史高斯樂做沙福特城fans
好在仲有史高斯喺度，佢唔鍾意教波，得閒上電視台講吓波，喺幾位班主之中，佢就最得閒，實可以去捧場。史高斯話做班主令佢重拾細個睇波嘅樂趣：「當你踢咗20年波，你會唔記得咗做球迷嘅感覺，做球迷嘅激情係完全唔同，係另一種感受嚟。做球員嗰陣，你全心全意爭勝，腦海中只會諗住對手係點，同埋唔想令隊友失望，但做球迷睇波就輕鬆得多。」
