33歲、回復單身的蔡卓妍（阿Sa），近日迷上言情小說，心靈沉醉於美好的愛情世界中，挑起一顆少女心。回到現實，新感情未有着落，眼下只有快將舉行的Twins跨年演唱會，與「另一半」鍾欣潼（阿嬌）日夜狂練。兩人合體邁向第15年，阿Sa從沒有厭倦，享受與阿嬌同坐一條船，是好是壞都互相分擔，還期待更親密的突破性合作關係：「想拍同性戀電影。」
統籌：林妙萍
撰文：林嘉慈
攝影：郭賢興
化妝：NatalieSoo.ki of ND&Co.
髮型：Sing Tam of pi4.com.hk
服飾及場地：Lane Crawford of ifc
阿Sa今年9月底宣佈與陳偉霆結束五年姊弟戀，日前在回復單身的生日會，被拍得醉爆大呼「男人成日講大話」，似乎情傷未癒。問那句是否抑壓已久的心底話？阿Sa尷尬地笑着說：「唉，算啦，有冇見到我塊面黃黃哋？俾人笑到面都黃。」她相信醉酒累事，不清楚記得當晚的事，「經過其他朋友同我重組嗰日嘅案發現場，係應該同緊一個成日講大話嘅朋友，喺度話佢，唔牽涉任何人。」
踏入33歲，她毫無感覺，「我發現30歲之後嘅生日，全部都冇感覺，哈哈，因為30歲前嘅生日，每一年都好期待，30歲之後就覺得『係喇，又生日喇，OK。』」她續說：「冇乜所謂，年年都有㗎啦，但每一年生日都係我又開心，又痛苦嘅時候，因為每一年生日，啲朋友都整到我好醉，今年亦都唔例外，醉到我都唔係好記得我自己做咗啲乜嘢。」
少女的戀愛心
單身數月，阿Sa未有新戀情，在愛情小說世界中自我陶醉，「最近好鍾意睇一個大陸網絡作家，叫丁墨，已經睇晒佢所有小說。」一系列有關偵探、科幻、商戰的言情小說，勾起少女情懷，連皮膚、輪廓都變靚，「撩起晒我啲少女情懷，我個條少女心拎咗出嚟，最吸引嘅地方係，佢所有小說嘅男主角都係非常靚仔，同埋極度高大，又極度專一，又有錢，又有地位，又叻又盛，你睇嘅時候，覺得呢個世界真係好美好喇。」少女寄望找高富帥男友，阿Sa都想，「有先得㗎，有呢個希望係好嘅。」至於有否被觸動渴求新感情，她答得精簡：「暫時淨係諗到演唱會，乜都未諗到住。」
孖妹的電影夢
阿Sa現階段專注年底舉行的Twins跨年演唱會，第五度踏足紅館，最大轉變是年代不同，潮流不同，「派台幾首快歌都係呢個年代嘅快歌，都係英國demo，我諗全球個trend係咁，個music style就係咁。跳舞都唔同，以前canton pop要食歌詞個重beat，𠵱家就freestyle啲。」
Sa嬌相處了15年，阿Sa從不覺厭倦，「只有覺得好賞心悅目嘅感覺，我諗冇人會唔鍾意睇靚嘢，咁你日日都有個靚嘅人喺你隔籬，佢係我嘅吉祥物嚟，要成日帶喺身。」有阿嬌，一切都變得簡單，「總之同佢一齊，好多嘢就算好複雜，都好似好簡單咁，因為有多個人同你去share，無論結果係好定唔好，都會有個人同你一齊，一條船咁。」不僅想合作搞演唱會、出唱片，孖妹一直想合體拍電影，惜去年合作的未上映電影，不是二人最渴望的類型，「其實好難，又要啱我同埋佢，我哋以往大部份嘅電影唔係做賊，偷人嘢，就係好朋友，可想而知，個故事好窄。」阿Sa熱衷新嘗試，今年憑《雛妓》破格演出角逐金像影后，想與阿嬌合拍的題材都充滿挑戰性，「我諗突破性啲，同我哋個image好唔一樣，先會有得發揮，例如：同性戀嘅電影。我公司一定唔拍，我諗要尋求比較細嘅公司。」
【開心就會型】
女人天生購物狂，阿Sa都不例外，她甫到場即表示日前在訪問場地睇中Saint Laurent皮褸，「助手問我幾錢會買，我話兩、三萬啦，點知佢睇完價錢就話：走得。」雖然心思思回頭，但冇折，還是死心。問阿Sa是否閒閒哋花兩、三萬買一件衫？她說：「我真係好難得先買一件兩、三萬嘅衫，通常都係畀人慫恿，因為平時做嘢啲衫都唔使錢，私底下出街啲衫都係好簡單嘅T恤、牛仔褲。」不講究潮流，穿得時尚，只因穿得開心，「最緊要自己鍾意，覺得開心，着上去唔會衰得去邊。」襯得精明都是關鍵，「唔在乎價錢同牌子，冇話全身名牌就係好，一個造型要和諧，必須要有唔同元素，如果有一件好繁複嘅衫，就不能夠再襯好繁複嘅嘢，除非個場合需要好loud。」
更多精采時尚內容，盡在 http://add.appledaily.com 。
