練馬師方嘉柏剛喺日本轉個大運返嚟，這晚於快活谷醒神到爆，頭三場各出一駒，結果頭場「和平開心」由方廐主攻手潘頓大熱開齋，到了第三場四班1200米，輪到「隨時候命」由小方徒弟何澤堯爆14倍冷Win，馬兒初嘗勝果，馬房一下子由龍虎榜第三位彈上榜首，累積17場頭馬，比二、三位告東尼同沈集成各多一場。
「隨時候命」之前兩戰都近，可以話係試準晒，今場續用何澤堯跑番谷草1200米，抽10檔起步，卻於末段貼欄竄上，最後一百米仍看似無法追上，但何澤堯好似雷神上身咁，完全一步不蝕，反觀一檔出閘沿途放頭的巫斯義的文廐座騎「歡笑多多」，臨尾有點閃出閃入，令「隨時候命」步步輸一步贏，觸線一刻衝贏「歡笑多多」開齋，認真有運。組合獨贏開A2派37.5元，何澤堯打破個人個半月頭馬荒，阿巫則影相飲恨，未能夠幫「歡笑多多」連捷，第三名由小方另一徒弟湯智傑策賢廐冷門「星際武士」拎到，第四名係潘頓座騎「善喜」，四重彩派二萬三千幾。
「隨時候命」馬主何子文表示，何澤堯騎來醒目，發現步速偏慢，即比前跟前少少，上仗馬兒有點外閃，今仗跑來有進步。何子文又表示此駒表現比他預期好，他以為馬兒會在沙田1400米才有望突圍，因為此馬性能偏長。