鷹君（041）噚日發公告，主席羅嘉瑞長子、任職集團業務拓展高級聯席董事嘅羅俊謙（Alex）獲委任為公司執董，升職之餘兼進駐董事會喇！
Alex自2013年起調返鷹君幫手，之前曾經喺投行工作，前年集團分拆朗廷酒店（1270）上市，據悉佢都一直有落手落腳幫手㗎，嗰陣有份參與投資者推介會嘅基金經理對佢更加係有讚冇彈，指Alex態度專注不特止，對答時亦十分謙虛有禮，一啲富二代架子都無咁話。
話說今年8月，集團宣佈旗下朗廷酒店進軍中東，不過當日羅嘉瑞急急腳走左，大家都好想知佢嘅發展大計係點，咁啱大仔Alex一直負責開金融投資、業務及項目發展，當中包括酒店物業嘅業務，唔知會唔會主力幫手做呢個project！