區選前夕，民主黨聲言要重奪葵青區主導權，還在選舉前搞咗個「翻盤」誓師儀式，野心勃勃，但事與願違，民主黨不單唔能夠喺葵青翻盤，仲要「輸凸」，由8席減至4席，據聞民主黨內部總結有關教訓，認為輸在兩大原因，包括太高調同佔中因素。
據知該黨認為選前講到明要「翻盤」嘅策略太高調，惹來建制派同中聯辦不惜借調其他區資源，以大量人力物力「槍打出頭鳥」，民主黨總結經驗，下次寧可「悶聲發大財」。但此舉都錯有錯着，建制派資源調向葵青，反令新界東多個選區後欄失火，被泛民奪得議席。
佔中議題 長者區趕客
另一個不得不承認嘅落敗原因係民主黨參與佔中，令該黨喺葵青區失唔少支持。呢個分析非區區適用，只因為葵青區人口極之老化，而民主黨喺葵青出選嘅區份幾乎清一色係公屋區，有黨內人指，民主黨喺其中一個葵青選區流失廿個義工，有義工不諱言係該黨參與佔中，不欲再為民主黨助選。
佔中議題喺公屋、長者區有幾唔受歡迎，花生友都可以想像，能夠保住議席嘅只因民主黨現任議員實力太強勁。較慶幸係，民主黨同對手今次喺葵青區傾盡全力，令該黨喺葵青區嘅整體得票較以往有增長，咁樣對該黨喺明年立法會選舉於新界西重奪一席，未至於絕望。
花生友
周二、四刊出