港鐵（066）運用財技諗出填氹方案，長期持有港鐵嘅基金同散戶，面對呢個需要為高鐵進一步填氹，兼且要借錢派息嘅方案，正常都唔會「say yes」。
由於港鐵需要借錢先派到息，根據美銀美林推算，假設透過銀行獲得融資，港鐵派完呢次特別息後，港鐵盈利將會被利息開支蠶食5%。
不過就算方案被港鐵股東否決，呢隻以穩陣見稱嘅半公用股亦優勢漸減，唔再係退休穩陣投資之選。
港鐵今次同政府嘅協議，清楚話畀大家知，只要係由政府做大股東嘅股票，都有機會染紅成為國策股。唔單係咁，環顧全球多國，賺錢嘅高鐵都係佔少數，所以到高鐵正式落成通車後，負責營運嘅港鐵，業績好可能會受累。
政府現時持有港鐵75.7%股份，但由於政府係關聯人士，所以屆時唔會就方案投票。而餘下24.3%自由流通股份入面，有19.02%係存喺中央結算系統之內，當中有16.34%係由託管人（custodian）持有，意味揸住呢16.34%港鐵股份嘅，有機會屬於機構投資者。
如果呢批機構投資者主要係長倉基金呢一類長揸港鐵嘅投資者，方案理應會被否決。
港鐵係今年少數能夠錄得正回報嘅恒指成份股，年初至今累積回報有15.25%，係回報第五佳嘅恒指成份股。不過經過事件今次之後，相信大家都意識到，優質藍籌又少一隻。
睇返50隻恒指成份股嘅表現，唔計港鐵，年初至今仍錄得正回報，而且與祖國經濟或政治相關度不高嘅股份，只係得返長和（001）、友邦（1299）同恒生（011）三隻咁大把咋！
El.
本欄逢周二、四、五刊出