買保險講求買個心安，理所當然。以前，賣保險，一定係賣保障，為身邊所愛着想，未雨綢繆，總好過出咗事先來諗對策。
𠵱家香港人越來越重視健康，這一點我相信無人會唔同意。所以，𠵱家做保險廣告，都唔會用恐嚇形式，同你講如果冇買保險，一旦死人冧樓、生老病死會點會點會點。相反，要同你講健康有幾咁重要。好似宏利保險最近的「MOVE」廣告，確實值得一讚。郁動、運動甚或印腳越多，都會健康更多，用咗佢條智能運動手帶，仲可以直接將一踏步、一舉手，轉換成保費折扣。這個將消費者本來對健康的擔心轉化成一種需求，慢慢養成習慣，仲自自然然加入優惠，的確太聰明。差不多同期，宏利的最大競爭對手AIA友邦保險亦推出其「Vitality」廣告系列， 講得白啲，唔止賣保障，仲賣健康態度同回報。沒錯，齋買保障而忽略健康，只會治標不治本。你可能都會同我一樣咁覺得，呢兩個Campaign似到無朋友。惟有講句：「Great minds think alike」。
講起保險廣告，仲有一條常用的橋，就係賣保險從業人員的專業可靠。好似近期的AXA安盛就打着「能幫助你的，都全力去做」去表達其在索償背後可以做到幾咁細緻、貼身、高效、以用家利益角度出發……來來去去，都係大同小異。反而，ING安泰人壽多年前的「一個好人」廣告，頭一次用誇張手法去提倡好人價值，扭轉做保險冇個好人的錯誤想法。
事隔多年，sell專業、真心確實有啲過時，因為兩者之間一係信、一係就完全唔信，而前者的佔有率變得越來越少。生意難做，點sell都好，可以入到位講一啲顧客真正關心嘅嘢，而又要切合你賣嘅Category、同品牌息息相關就係好橋。你睇，智能運動手帶並唔係今日先興，好多香港人都有啦，價錢由一千幾百到近日小米出嘅99蚊一條都有，絕無任何特別之處。但諗到將佢對健康的承諾連繫到保險，一個字，醒。
文廸晞
mailto:[email protected]