騙徒手法層出不窮！城市傳聞，有一名姓香港人，於6年前在街上被一名鄭姓中年女子游說，購買一張「講心膠跌」飛氈，當時鄭女聲稱飛氈可以讓香先生由香港飛到廣州所花的時間由100分鐘減半至約50分鐘，造價只需669億元，今年起貨。當時鄭女還稱，「早買早享受，遲買會執輸」。
香先生質疑，飛氈點做邊檢，會唔會俾人拉當偷渡。鄭女當時實牙實齒表示，技術問題一定可以解決。香先生周圍還有一班路人街坊不停叫好、叫抵，說唔買就笨，終於經不起鄭女及疑似是「媒」的街坊疲勞轟炸硬銷，簽卡畀錢。
今年想攞貨時，鄭女已經離職，一名貌似忠厚的張先生招呼香先生。張稱，當日鄭女搞錯，交貨日期應是2018年第三季、價錢實為853億元才對，但見香靚仔nice guy，決定將飛氈面積縮細，配件降級，減8.8億元至844.2億，額外付出少於200億元，便可享受飛氈帶來的方便。
香先生無力支付這196億元，又覺得張先生間公司唔老實，要求退回669億元，但遭張拒絕，還稱如不付款，會向香追討停工損失，因為飛氈已完成75%，唔要都要賠償幾十億元。
香進退維谷，弱弱地問：「咁邊檢問題呢？解決唔到，我收到張氈都冇用。」這時公司法律顧問袁某出場，稱其實只要在香先生家中劃出一角，交下門匙，讓內地邊檢人員隨時入屋，便可省時快捷完成邊檢。
香聽完更心驚，便以沒錢為由想離開。誰知此時張表示，由於時間關係，公司已為香向財務公司取得貸款，今次見面順便禮貌上知會而已，而於會面期間公司已派人到香家配匙，以方便公安隨時到香家執法。
時間繼續流逝，2018年第三季，香先生仍未收到飛氈，加錢、延遲交貨的理由無限輪迴。到2020年終於收到飛氈，一充電，飛氈便爆炸自焚，再一次證明「中國的會爆炸」。結果香先生繼續被借貸為飛氈付款維修，欠下財務公司的債項亦越滾越大，生活捉襟見肘。
另一方面公安則在香家自出自入，除邊檢執法外，一時向雪櫃執法，指食物太多造成浪費要充公；一時又話沙發、床褥太軟影響健康，禁止香坐卧，佔據由「一角」擴展至全屋，最後香只剩下衣櫃這「合法」容身空間。
如果時光能倒流，香先生應早於2010年時便對一地兩檢未解決、配套設計不合理、效益存疑的「講心膠跌」，大大聲說不。香港人較香先生幸運，有機會在2015年這關頭，當政府那些年的種種承諾都變成謊話，壯士斷臂止蝕，拒絕繼續陷入港深高鐵這大騙局。
釋條鐵
自由撰稿人