播足42年的《警訊》一直以戲劇形式，將各式各樣的犯罪手法呈現觀眾眼前，以警惕市民。近年則以潮拍手法吸引年輕人收看，當中四位御用演員更忽然紅爆網絡被大起底，包括擁惹火身材、被網民封為「警訊之花」的馬溱禧（Heily）、演宅男及每次都做受害者的王文韜（阿寶），還有經常演肥師奶的肥妹Toby及惡人Kelvin。為測試四位演員合拍程度，《蘋果動新聞》日前訪問他們，要求他們扮鬼扮馬，還特別炮製「玩爆你個警訊女」偷拍大整蠱，當四位專心演戲時，導演忽然發難狂駡助導，難得四位十分專業，完全沒有受影響，事後更齊齊認叻說早已懷疑「有伏」。騙徒手法曾出不窮，拍得《警訊》多真係咁叻？
撰文：小米
Heily為飽飯棄𡃁模
現年26歲的馬溱禧，當年只差一點點便踏上𡃁模之路：「自己好快覺得唔可以囉，原因好簡單，冇錢就要做嘢㗎啦！要照顧屋企人，要照顧自己，唔可能坐喺度等通告。」Heily承認喜歡演戲，但夢想同飽飯，她會選擇後者：「我其實主要係做美容產品生意同埋開Play Group，演戲當兼職啦！」
Heily因經常在《警訊》中扮嗲呃人，網民封她為「警訊女神」，惟Heily自爆現實生活中完全不懂嗲人：「我講嘢一向粗聲粗氣，唔知點樣嗲，所以做騙徒角色都幾啱我！」對於早前收到神秘男將性器官相片傳給她，Heily惟有到警署備案自保，她說：「網上世界嘅人見唔到你，覺得做任何嘢都唔使負責，我見到網上有人鬧我，你話我MK又得，話我似雞都冇所謂，把口生喺人哋度，你話我醜唔通我又去整容咩！」
阿寶讀演藝等機會
王文韜明顯是對演戲最有冀望一個，為了演戲他不惜辭掉實驗室工作，他說：「我兩年前辭職嘅，當時停工半年，啲錢用得七七八八，我就去搵錢囉，我搬搬抬抬乜都做，有次去咗港台做啲搬搬抬抬嘅嘢，有人知我鍾意戲劇，就係咁介紹咗我拍《警訊》喇！」
提到實驗室工作，全身充滿演戲細胞的阿寶，回應時似足拍笑片一樣：「食你唔飽又餓你唔死咁啦，係死路一條，勞而不獲，每日將啲醋倒入個碗，然後㩒電腦F5個掣，咁就係我一日嘅工作，重複又重複，我寧可食少半碗飯做自己想做嘅嘢！」問他可會主動找機會演出？阿寶透露現在正報讀演藝課程，他又相信機會要來就來，會耐心等待。
Kelvin挑戰阿澤搞笑
自爆曾幾何時有想過當演員的Kelvin，自嘲成長後見到自己長相及高度，好快便打消念頭。他笑言：「始終夢想唔可以當飯食，𠵱家當係興趣好開心，我想做無人阻止到我。」Kelvin正職是做美容院市場推廣，主要工作就是找客源，他說：「𠵱家拍下《警訊》都好開心，如果有機會我會想做類似杜汶澤嗰啲角色，帶歡樂畀人。」
Toby最愛做開心果
本身是化妝師的Toby認識Heily後才有機會拍《警訊》，她說：「我冇諗過全職，因為我咁嘅樣同身材，我諗冇乜可能啦，但做吓丑角，好似吳君如、沈澱霞嗰啲咁都開心嘅。」笑問Toby可有想過減肥演女神角色？她自嘲應該沒有機會，因為家族本身都較肥胖，試過減肥，但最後因為太辛苦放棄了。