吳綺莉同成龍所生嘅囡囡吳卓林唔經唔覺已經16歲，望落樣貌同老竇真係有幾分相似。事實上遺傳呢樣嘢真係唔到你唔信，喺國際學校就讀嘅卓林噚日喺Instagram貼出一張血淋淋嘅相，一名不知性別身穿白色汗衫嘅人仲疑似爆頭倒卧喺血泊中。卓林之前曾經透過學校報警話俾媽咪虐打之後，又試過情緒唔太穩定，透露過有輕生之意，情況好令人擔心。好在佢都有用英文留言解釋：「Media class film project.（傳播學拍攝功課。）」先知道係學校上堂嘅作品。
效果細緻逼真
而又唔能夠唔讚卓林應該係得到演員兼導演老竇成龍DNA嘅遺傳，呢張相無論喺拍攝同構圖都好有心思，就連血濺嘅效果都做得好細緻同逼真，難怪驟眼睇落去令人不寒而慄。
經歷過今年4月報警指控媽咪之後，原本情緒都好波動嘅卓林近月心情明顯好番好多，喺佢Ig成日見到佢貼啲貓貓相，上星期翁靜晶大女劉萬儀仲親手整咗個蛋糕同佢慶祝生日，多咗人關心嘅卓林已經開朗番。
撰文：馮仁昭
