【公審鉛凶】
【本報訊】房屋署等部門一直聲稱對焊料含鉛風險認知不足，但負責6個鉛水屋邨的水喉匠伍克明昨在鉛水聆訊作供指，90年代已知需用無鉛焊料，因鉛有可能滲入水管，是首名承認早知含鉛焊料風險的證人，他歸咎信任三判故「冇諗過佢裝我彈弓」。
負責鉛水屋邨欣安邨和興建中安達臣道工程的有利項目統籌譚善庭作供指安達臣道工程中，三判永興東主莫海光曾向房署提交FRY無鉛焊料審批。但莫海光指根本不知焊料是否含鉛，亦不知審批結果。委員會主席陳慶偉問他「係咪鍾意用咩焊料都得？」莫答是，稱在地盤樣辦房一直使用普通錫條，無人指不可以，故接駁喉管亦使用普通錫條，「冇人話唔用得，咪跟住用囉」，僅錫條缺貨時才轉用FRY無鉛錫線。
稱90年代已知要無鉛
剛被除牌的明合水喉匠伍克明作供指，90年代已知需用無鉛焊料，因有外國水喉進口商定期解釋物料最新資訊，故知鉛會經缺口滲入水喉，使用無鉛焊料就不會影響水質，他指FRY是較暢銷的品牌。被問到是否業界都認識此無鉛焊料？他指：「做咗廿幾年水喉，如果唔識，點出去做生意。」
他指6邨無收過焊料不合格報告，而三判有逾20年經驗，理應知房署要求，無懷疑他們會冒險違規。他與三判簽約前均會解釋房署物料規格，但不記得有否明確講焊料要「無鉛」，而三判送交物料樣本時是用無鉛焊料，「冇諗過佢會突然轉用另外一隻（焊料），可能佢唔想我知啦」。伍指靠肉眼難分辨含鉛錫條及已剪開卷裝無鉛錫線，「𠵱家好似捉賊咁梗睇到，但以前唔係㗎嘛，落樓梯都冇留意有冇手柄啦」。
伍於10月31日離職，「好大壓力，我本身有病，六十幾歲，頂唔順，所以做咗三十幾年嘅公司都要辭職」。他休庭離開時，被問到自己是否有錯，稱「有錯梗係要承擔」，但哪方面做錯則要「諗吓先」。
■記者鍾雅宜、袁柏恩