在茶樓聽完醫生C（細C）講家庭故事，自然嘆息1949年係中國家庭歷史之分水嶺，內地與外地訊息斷絕，鬥地主，清算資本家令不少民國富豪、中產傾家蕩業，變成一貧如洗，全國進入均貧狀態，除咗共產黨之外，無人得益，直至1980年後，因鄧小平堅持改革開放政策，實行包產到戶，於是中國先至走上創富之路，暴發戶大批湧現，到咗21世紀，中國中產家庭會多過全美國人口，問題係富豪富戶之中，不少錢財係自不法途徑取得，如貪污、勾結、內幕交易、情色交易、走私等等，於是倫理道德幾乎蕩然無存，全民向錢看，禮樂崩壞矣。左丁山阿嫲冇醫生C阿爺咁叻咁多錢，但戰前在香港亦搵到一筆錢，回鄉買咗三十畝良田，香港淪陷三年零八個月期間，全家回鄉避難，靠農田吃飯，勉強溫飽，但1949年後，亦變成一無所有，父親隻身回港，全無依靠，變成貧戶。假使當年阿嫲在港買田地，例如在西洋菜街買番幾畝，左丁山今日就唔會寫稿啦，呢個夢自己發過㗎，可惜歷史冇如果嘅啫。
同醫生細C傾完，去大C張枱坐吓，大家相識多年，閒話不拘，笑佢：「貴校權威教授講英文似乎冇乜邏輯可言，李國章又話可能要向港大及學生進行民事控訴，相信係講吓嘅啫，你點睇？」醫生C話：「冇眼睇就真，我話過以後如果李國章做港大校委會主席，我斗零都唔捐俾港大！」咁決絕？或者李國章有好多大富豪家庭俾面幫手，籌款更容易，更多呢，靠英國人校長馬斐森就難籌款啲咯。醫生C問：「你覺得港大校委啲英文點？」左丁山連忙耍手擰頭，叫佢睇陶傑，左丁山係中文大學產品，點敢批評英文大學校友校委（梁智鴻、王䓪鳴、紀文鳳、盧寵茂皆港大精英學生）啲英文呀！想當年左丁山在美資銀行做研究部主任，一位港大senior某日將一份英文小冊子掉落左丁山張枱話：「我地港大生係唔多識中文嘅，你負責繙譯呢份小冊子為中文啦！」哦，港大生唔多識中文，中大生唔識咪死火？忍住度氣當學多一件事，將份小冊子譯成中文，加上封面標題，「唇槍舌劍，盍興乎來」，就成為港大中大兩校第一屆辯論比賽嘅說明，由我地銀行贊助，現在好似仲有呢個比賽，有此教訓，以後左丁山對住港大朋友，唔多敢講英文，要評點梁王紀盧四位校委之英文，由留學英國讀文學嘅陶傑開吓我地眼界好嘞！