大台爆小生花旦離巢潮，搞到開著電視睇嚟睇去都係同一班人。不過正所謂有危就有機，有周刊報道陳煒趁住電視台鬧人荒，以42歲高齡簽落7年長約，將備受力捧。周刊仲指佢突然被睇中嘅原因，係因為佢嘅宿敵——「長腿姐姐」萬綺雯（蚊蚊）唔肯簽約做親生女，所以電視台喺冇得揀之下同咗陳煒簽約。
據報道指，蚊蚊同陳煒幾乎鬥足十幾年，兩個同係亞姐出身，兩個都做過亞視嘅花旦，又先後過檔大台。既然係咁，佢哋應該好friend至係，為乜會有傳佢哋面阻阻呢？
原來係陳煒喺13年前拍過一套亞視劇集《乘勝追擊》，喺一場輪姦戲中，要被臨記舔耳同咬唇，當蚊蚊等同台女藝員被問到有乜睇法時，蚊蚊就一時心直口快咁話：「我都唔認得係佢（陳煒），以為係臨記添！畀我梗係唔制啦，咁核突！」就係咁陳煒就嬲咗蚊蚊，一嬲就13年喇。