傘運後，越來越多人關注青年組織成立，噚晚由大律師容海恩Eunice牽頭嘅「香港青年˙專業網絡」舉行就職禮，呢個平台主要為青年提供創業支援、實習機會等，仲請到唔少猛人主禮，包括幾經波折終上任嘅創科局局長楊偉雄、新民黨主席葉劉淑儀、廠商會前會長施榮懷等，連專打人權案嘅資深大律師潘熙都出現撐場兼主禮（圖）。
有法律界桂綸鎂之稱嘅Eunice話，出席嘉賓都係佢好朋友，而潘熙係佢城大法律系師兄；至於青專網會唔會搵對方幫手？佢笑言對方事忙，但有需要都會問佢意見。撐小師妹嘅潘熙則講明唔會幫手，除非有法律問題啦。
至於被指同葉太漸行漸近，Eunice有冇入黨打算？佢話暫時對政治興趣唔大，搞「青專網」只因幾個志同道合年青人都有興趣，而佢喺加拿大讀書時主修電腦，亦有創科相關工作經驗，透露初步同阿里巴巴集團聯絡緊，想為青年爭取到該集團嘅「香港創業者基金」支援。