區選過咗，但呢一役只係呢幾年選舉戰嘅前哨。民主黨噚日續喺facebook貼四格漫畫，提醒選民唔好俾啲建制派呃，以為攞咗蛇齋餅糭就一定要投番建制派。白鴿黨呢期啲漫畫越整越多，而且喺網上呃like指數唔錯，前排仲「成功爭取」民建聯重視兼表達不滿。據知白鴿黨呢場漫畫大戰，或者會打到去明年立法會選戰。
白鴿黨噚日出嘅四格漫畫，講緊有位建制派1號候選人打電話畀長者，提長者記得投1號，仲話「你食糭填咗表格，唔投1號就犯法！」於是長者無奈話「咁我唯有投1號啦！」呢啲漫畫內容，係改編自真人真事，喺區選贏咗嘅乳鴿鄺俊宇，日前都向傳媒分享咗呢件事。
考慮書展出書諷建制
白鴿黨中常委黎敬瑋透露，呢批白鴿自己製作嘅四格漫畫都有五、六幅，實情除咗選舉，有關政治、政策嘅議題佢哋都有整漫畫，加上未來仲有立法會新界東補選、立法會換屆選舉，所以佢哋會keep住整，希望起到教育作用，仲話可考慮明年書展整番本《建制派無恥漫畫實錄》㖭。
相信白鴿若然真係出漫畫，民建聯就會好頭痕，因為之前佢哋睇完白鴿某幅漫畫後嬲豬咗，覺得白鴿影射佢哋，可惜連北京喉舌《文匯報》訪問嘅法律意見都話，呢單嘢喺法律層面上難以舉證，即係無白鴿符。
李八方
mailto:[email protected]