有英雄輝之稱嘅葉鴻輝同歐鎧淳（Stephanie）近期人氣急升，兩位最近被珠寶公司睇中，邀請拍攝宣傳廣告，雖然未出街，但原來兩位主角唔同時間拍攝，搞到大家緣慳一面。
美人魚歐鎧淳繼美容、隱形眼鏡同服裝品牌後，今次殺入珠寶界，化濃妝上鏡嘅佢話成個拍攝過程只用咗兩三個鐘，唔會影響練水，最緊要係廣告意念好：「一心一意」，代表佢對游水可以付出一生，美中不足係見唔到拍同一個廣告嘅葉鴻輝。原來美人魚都有留意港足最近世盃外嘅表現，仲大讚佢哋喺全港市民注視下，仍然可以打和中國，佢哋處理壓力嘅能耐值得自己學習喎。
與歐鎧淳緣慳一面
葉鴻輝喺世盃外對中國守住唔失波後，人氣勁升，去到邊都俾市民野生捕獲，佢話論受注目度，今次港隊確實勁過09東亞運奪金 。人氣勁，自然有商業機構睇中，除咗呢個珠寶廣告，球會仲幫佢接咗個手機遊戲廣告，仲有啲就傾緊，佢話廣告由球會同佢傾，唔知價錢，但就好開心見有商業機構願意用足球員做代言人。