由五個傳媒合辦嘅「2015十大港聞選舉」昨開記招，邀請市民投選過去一年最難忘港聞。律政司司長袁國強（圖）原本係活動主禮嘉賓，但最終冇現身，大會話佢病咗嚟唔到。八方問過律政司發言人，確認袁司長身體抱恙缺席；到底係乜病？咁就不便透露喎。
做官要好打得，前提梗要身體好；八方發現袁國強體質似乎麻麻喎，今年10月1日嘅升旗同酒會，都因病no show，睇嚟袁國強都要諗法子強身健體，踢走個藥煲至得喇！
講番十大港聞選舉，主辦機構列出29項2015年重大新聞事件，包括政改否決、建制派投票甩轆、鉛水事件、羅君兒綁架案等。現場嘉賓嘅投票結果，以鉛水風波暫領先。