這天沙田馬場舉行十組泥、草大閘，最矚目自然是盛傳身價逾2,000萬港元的摩廐馬「代代為王」在港第一次試閘，參試第一組1000米草閘，馬主是富豪潘蘇通，結果該駒在莫雷拉胯下全程按實找遮擋跟跑，以第五名過終點，未見真章，但其實走來已很輕身。
潘蘇通曾在馬圈威到盡，已退役的「事事為王」同高伯新攜手贏過打吡同埋香港盃，之後養馬運亦不差，今季暫時憑「大運財」贏過1200米國際二級賽馬會短途錦標。潘蘇通向來重視大賽，所以轉同大賽之王大摩合作，一點也不出奇，大摩為潘蘇通購入「代代為王」，聽講身價超過2000萬，絕對唔講得笑。難怪這天在港初次試閘，大摩和未婚妻FiFi姐及兒子George三個人，一起到機坪為「代代為王」打點一切，非常大陣仗。
「代代為王」曾以「團結一致」譯名，在在6月16日英國雅士谷馬場，1600米國際一級賽聖詹姆士皇宮錦標配戴圖理，只不敵「教堂峽谷」、「洛恩港人」得季軍。
講番今天這一組試閘，頭馬「嘉應之友」亦唔嘢小，在潘頓胯下跟前末段輕騎透出，勁如炮彈掄元，亞、季軍是「得盛」、「十分醒目」。「嘉應之友」在港未上陣，但係澳洲級際賽常客，曾勝昆士蘭鷹園1600米一級賽阿堅斯錦標，亦係滿利谷1600米二級賽史德錦標冠軍，乃容天鵬開倉至今級數最高自購馬，11月17日此駒亦贏過一次沙田1000米草閘，狀態進度甚至比「代代為王」更佳，而兩駒極可能在經典一哩賽碰頭。