【扮靚籽：時裝絮語】
王君萍（鴨仔），星級健身女教練，人人看見她第一句都會問：「嘩！男定女？」天生面孔比好多男人還俊俏，再因健身而擁有比好多男人還健碩的身形，被人指着說雌雄同體不倫不類的她，是亞洲健美錦標賽女子組冠軍。「本來我就係女仔嚟㗎嘛！」王君萍的打扮一直受外形、工作所限制，時裝設計師Makin Ma這次為她構思出不同造型，雄赳赳的身段和華麗的裙子，以刺激眼球的畫面告訴你，健美，就是一種尋求自我突破的美學。
「成世人冇諗過着晚裝裙」
「點解要作男仔頭打扮？因為我鍾意運動，一日沖三次涼，着運動衫最方便，細個返學同學個個冇嘢，反而𠵱家大個就有人話我不倫不類。本身我就係一個女仔，奈何我選擇的運動、我穿的運動衫，在那一刻，讓你的感覺有不同。大家第一眼望到我會覺得我好大隻，或好冷酷唔笑，覺得我只可以穿男裝，但我覺得，男仔會有女仔的特質，女仔也會有男仔的特質，我自己鍾意狗仔、鍾意儲衫褲鞋襪，咁係男仔性格定女仔性格？男定女其實不是問題，只要你覺得我是一個人，對我有尊重，那就可以了。
愛嘗試 懶理別人想法
「我買衫好難，一係着爛、一係唔襯我，唔識配搭着運動衫最好；出席宴會或隆重場合我會穿tuxedo（燕尾服），我訂做的恤衫西裝其實都是女裝cutting，不過我穿起來大家看上去都像男裝。這次參加這個改造project，有人幫我做styling感覺好特別，冇諗過這一生人、到現在，會穿這樣一條裙！我玩健美咁耐都唔會刻意掩飾自己身體，只是在街上唔想被人不斷望，說『嘩！呢個人好大隻！』健得身係預咗，但都係幾煩，或者說，我唔想騷擾到其他人啦。你叫我穿起晚裝，展示肌肉，我覺得沒所謂，我本身就是這個樣子，我就是我，有型、靚就得，『型』和『靚』，都可以用於男仔或女仔吧。叫我下次去party再穿這些衣服？我想在肯定裙子不會掉下來的情況下我會試穿，但也要視乎是甚麼宴會，我這樣穿一定會好搶鏡，無謂搶晒人鏡嘛。但別人的眼光我唔會擔心，因為比起別人的想法，我更在乎嘗試自己未試過的。」
王君萍Epsilon （鴨仔）
•現年36歲
•身高 1.62米
•三圍37” 29” 35”
•2003年亞洲健美錦標賽女子49公斤級別冠軍
•國際健美健身邀請賽2013女子（49公斤以上）冠軍
•2014年於電視節目《沒女大翻身》擔任魔鬼教練
Makin：為女性帶來新的定位
「找衣服給鴨仔很難，因為她身材不屬正常女性身形，所以最後決定自己做兩條裙給她，整個project我們乜都試，希望能為鴨仔以至其他女性做到靚的、新的定位。改造過程很開心，我純粹想她做回自己，跟她傾過偈之後，你會發現她是一個很簡單、很率直的人，只是她沒有真正放時間去研究自己的外表，但當整個團隊一起跟她談起不同ideas時，她都會好雀躍好想試，我想就是她這個很開通、很投入的態度令我們的project能向前行。鴨仔說得很對，當一個人信得過、有責任感、對身邊的人好，她是男是女又有甚麼關係呢？我希望她可以將別人的眼光再放開點，而社會對男女形象的枷鎖亦可以放開點，時裝其實是一個trial and error的實驗，你相信自己的一套生活態度，開始去做，就可以影響社會，帶動起那一股潮流。」
髮型 Matthew Cheng@Legend Hair Salon
化妝 Euny Wong@Jet’aime professional makeup
場地 A.M. 503 Studio
MJM http://www.makinjanma.com
Heaven Please 銅鑼灣百德新街50-56號唐寧大廈1A
Dearbell 上環永吉街28號永吉利商業大廈2樓28室
記者：容慧心
編輯：黃仲兒
美術：黃創泰