成日喺facebook抽水諷刺時弊嘅自由黨榮譽主席田北俊，喺TSA議題上抽着火水。話說佢po踩單車相感嘆昔日冇機會考TSA（圖），惹網民追究佢根本冇就有關議案投票表態。田少接受《壹錘定音》訪問時向市民致歉。
田少解釋，協助佢處理fb嘅「田毛毛」已提醒佢，因為喺取消TSA議題上缺席投票，發此帖或惹批評。但田少話投票當日，張宇人同鍾國斌一個投反對、一個投贊成，同黨有唔同取向，佢覺得可藉fb釐清個人希望取消TSA嘅立場。
對於網民批評佢唔投票卻反過來抽水，田少接受批評並就此道歉，強調日後會改進，「估唔到咁早投票，如果我在場我會投取消（TSA）」。