「佢係一個好稱職嘅騎師，現階段我都好滿意同佢嘅合作，我個人都希望同佢續約。」
接受訪問嘅係練馬師文家良，佢口中稱職嘅騎師就係巫斯義。
喺香港，有份筍工叫馬房主帥，法籍老將巫斯義就打緊呢份工，月入最少10萬蚊。
咁乜嘢係馬房主帥呀？即係理論上只可以騎所屬馬房嘅馬，想騎其他馬房嘅馬，就要得文家良批准。
10萬蚊人工咁高，點得番嚟呀？每位馬主每個月要夾2000蚊請阿巫，由於文家良馬房有超過50匹馬，阿巫淨係份糧至少10萬蚊，計埋策騎費及獎金，每個隨收入時超過20萬。
高比拜仁37歲已宣佈退休，阿巫就嚟49歲，啲馬主同意續約咩？
「辣得很」馬主黃紋個仔吳少庭，就有咁嘅睇法：「巫斯義本身騎功好出眾，佢份人人品亦唔錯，會好詳細分析啲馬嘅情況畀我哋聽，喺佢身上學到唔同嘅賽馬知識。」
阿巫份主帥合約本月23日賽事後就屆滿，但照文家良及馬主咁講，睇嚟佢真係坐定粒六，可以叠埋心水，繼續打好呢份筍工。