無綫前晚播首集真人騷《網絡挑機》，邀請咗近20位網絡紅人，包括司徒夾帶、JFung、伍公子同Eminleo等，強調佢哋可隨意踩無綫，節目播出後，網民即譏笑Youtuber似小丑，俾無綫玩，即使佢哋訪問王晶同陳百祥時，亦顯示Youtuber冇成功挑機，玩人變被玩，佢哋拍嘅片又俾無綫「河蟹」，有網民更喺討論區揶揄呢班Youtuber。
司徒夾帶認博出位
司徒夾帶俾網民狂插譁眾取寵，揶揄佢想借節目入屋，網民亦唔同情伍公子拍嘅片段被cut：「Youtuber就做番個Youtuber，唔好踩過界諗住做明星。」司徒夾帶噚日喺電話度話：「我係譁眾取寵，睇開我啲片嘅人都知，我梗係博出位，但我又唔係賣假學歷，又唔係拎條事業線出嚟，我擺明係借無綫大氣電波增加自己知名度。」佢前晚睇完節目，唯一不滿係訪問阿叻時，有啲精采對話被cut咗。
伍公子噚日凌晨則喺fb爆粗反擊：「我X你哋啲港豬留言！𠵱家我有份做節目，我叫你唔好睇，就等於鄭少秋親口話《靚聲王》唔靚聲，夠晒說服力啦？𠵱家話X咗你知，又叫X咗你唔好，你班X係都要睇……」伍公子強調參與節目有兩個目的，一係要指出無綫有幾核突，二係要講出香港人有幾核突。佢噚日喺電話補充話：「對呢啲負評或正評都處之泰然，要講都喺網上講晒。」
撰文：馮仁昭
