香港唔少政界中人都鍾意寫書法，估唔到消委會主席黃玉山都好此道！話說第20屆國際消費者聯會全球會議日前喺巴西首都巴西利亞舉行，主題係「釋放消費者力量：環球市場的新視野」；香港係上屆呢個全球會議嘅主辦城市，為咗表示支持，黃玉山特別喺會議晚宴上向東道主巴西官方消保機構「SENACON」送咗份厚禮道賀。
到底乜厚禮咁巴閉？原來係佢嘅墨寶，親筆寫上「推動可持續發展 保障消費者權益」，由「SENACON」秘書長Juliana Pereira da Silva接收（圖），祝賀巴西保障消費者法典施行25周年。八方聽聞黃玉山平時都有練開書法，呢張墨寶出發前已預備，夠晒細心。