飲茶時分，碰到三位醫生C，都係港大醫學院師兄弟，論資排輩，大C最早畢業，中C次之，跟過大C做houseman，然後到細C嘞，但睇起上嚟，中C與細C好似年紀差唔多噃，左丁山好奇心起，問細C：「你低班過中C㗎？」細C答：「我係超齡學生嚟嘅，小時候由父親安排，從寧波落嚟香港，冇學校收，因為唔識英文吖嘛。好彩阿爺嗰代有啲關係，卒之入咗蘇浙公學插班小四，其實係留級，蘇浙用普通話教學，我當然無問題，但英文就死晒火，唯有集中精神日背夜背，居然到咗學期尾，全班考第一，再過兩年考升中試，僥倖名列前茅，派入皇仁書院，之後考入港大讀醫，比同學嘅標準年齡大兩至三歲。」
原來又係香港新移民嘅奮鬥成功故事，唔怪得佢今日講廣東話仲係帶啲外省口音。佢又話當年已考到敬文獎學金預備到美國做「朱仔」（Chu Scholar），靠洗大餅賺學費，跟住又得到加拿大McGill錄取，但學費好貴，家人話上當舖都要支持佢留學加拿大名校，點知最後得到港大醫學院錄取，家人歡喜若狂，咁就唔去加拿大咯。讀書叻，人生選項係多啲嘅，考入港大醫學院，咁就脫離貧窮，今天成為富裕中產，仲收藏埋不少名畫古董。但細C話：「其實我與阿爺相差好遠，我屋企老早有大把錢，阿爺係大紡織廠老闆，但1948年與工廠廠長來港考察，阿爺唔鍾意香港好似窮鄉下咁樣，與上海繁華相差太遠，唔肯將工廠搬來香港，反而向德國訂購最新紡織機，預備在抗戰後擴充營業。1949年機器到香港預備轉運上海，阿爺派廠長來港接收機器，押運返上海，點知局勢大變，毛澤東佔領上海南京，阿爺郁不得其正，再過半年，交通斷絕，後來清算資本家，阿爺家產全部冇晒，由大富豪變成一貧如洗，好彩還有一啲地方關係，阿爺逝世後，我地可以申請移居香港。講起嚟，就一殼眼淚。」咦，嗰批滯留香港嘅紡織機器呢？細C話：「益晒個廠長，佢人在香港，冇返到上海，接收晒啲機器後，就自己在香港開廠，現在佢嘅後人係大富豪級數！」啊，咁就真係時也命也，在戰亂嘅大時代，有幸有不幸，睇錯邊者（細C阿爺）就成為共產中國犧牲品，夠膽夠運夠拼搏者（廠長）就成為富豪，問細C有冇同大富豪兒孫見面，細C話：「冇！呢啲事一說便俗，又攞唔番嘅，無謂俾人話我係酸葡萄。」