區議會選舉塵埃落定，泛民同建制幾個雙料議員落馬。人稱象哥嘅民建聯黃定光噚日同傳媒蟹宴，其間被問到點睇黨友敗選，包括葛珮帆（EQ）敗選後盛傳曾向黨友發短訊，認為落敗之因包括政府唔理佢選情，要喺區內建插針樓喎。象哥聽完就勸對方咪賴地硬，強調變幻原是永恒，應該學識自己變通喎。
邊境購物城趕五一開張
象哥仲話，區議會選舉其實好講街坊睇唔睇到你，覺得EQ有啲輕敵，仲搞爛gag話喎，對方成日去非洲睇佢、即係睇大象喎，暗批有人經常不在港、冇花時間落區囉。
象哥自己就繼續忙住搞新田嘅邊境購物城，佢透露未必能按原定計劃喺明年1月中開業，但希望趕唔到農曆年檔期都趕到五一前開張。佢話之前招商已超額35%，本周二同四會搞特邀招商，目前預計有208個店舖，呎租由67元至107元，保守估計閒日有8,000人次，假日就有12,000人次。