金價跌到6年低位，筆者第一個諗起嘅係歌手周柏豪。
周柏豪過去幾年不時於受訪時透露自己有投資黃金，兩年前就話自己用咗6位數字嘅錢買金，但隨住金價4年前見頂後越跌越有，周柏豪舊年受訪被問及黃金行情時，話金價點都會有調整，買金唔係短炒係長揸，目的係對抗通脹。
筆者認為，買金抗通脹嘅講法係冇錯，因為已經有唔少研究講過，黃金短期走勢未必完全跟隨物價變動走，但長期走勢的確同通脹升跌有好大相關性。可惜金融海嘯後，任憑環球各國央行點放水，始終都谷唔起經濟增長同物價。
雖然本港過往幾年因住宅租金同鋪租不斷上升，通脹水平不低，但環球市場就係另一回事。既然環球冇乜通脹，未來幾年仲分分鐘跌落通縮，當經濟大環境進入銀紙唔多貶值嘅時代，買金對沖通脹呢個智慧自然唔適用。
從技術走勢睇，由2001年開始嘅金價大牛市已喺2011年見頂，雖然金價已由2011年每盎斯1,920美元嘅高峯，跌到家陣嘅挨近1,000美元，但金價嘅大跌浪只係行咗大約一半，最壞情況可能要下試350美元左右。
如果你相信經濟有周期循環，你就會相信環球經歷完通縮後，通脹遲早重臨；如果你相信通脹會再現身，你就會相信作為對沖通脹工具嘅黃金，遲早再獲投資者垂青。問題只係金價要幾長時間先升返，又會唔會返去周柏豪入市嘅價位。周柏豪買金嘅故事，話畀我哋知身處金融海嘯時代，傳統投資智慧未必有錯，關鍵係是否在適當嘅時間運用。話時話，有另一樣資產同黃金好似，一樣成日俾人話可以保值，嗰樣叫「磚頭」。
El.
本欄逢周二、四、五刊出