港大前校長徐立之（圖）同一班有心人創立咗香港科學院並任創院院長；呢個組織獲得特首梁振英高度重視，除咗周六嘅成立典禮罕有喺禮賓府舉行（不過係閉門囉）；周日舉行嘅國際高峯會，CY亦會出席，難怪徐教授都話梁班子喺推動創科方面好積極。
雖則獲創新及科技基金撥款324萬，兼獲全國政協蔡冠深捐助同額費用，令港科院暫時有近650萬可以用，但長遠要持續，梗係唔夠使，所以徐教授都同八方講，要積極向商界人士揼心口。
佢話港科院長遠都要成立基金，滾存一吓資金，但每年究竟要幾多使費，則要稍後計吓先有數得計。設喺科學園嘅辦事處已經運作，網頁係 http://www.ashk.org.hk/en_index.php 。
身為團結香港基金顧問嘅徐教授仲透露，正為基金搞緊有關創新科技嘅研究報告，似乎佢卸任港大校長後，仲忙過以前咁噃。