楊千嬅噚日以大使身份同周柏豪、東華三院主席何超蕸等人，喺尖沙嘴出席「東華慈善嘉年華」啟動儀式，嘉年華會喺今個月21日喺舊啓德機場跑道開幕，40幾款機動遊戲中嘅「人肉陀飛輪」相信最具號召力，部份收益會捐畀東華三院。
玩到似骨折
千嬅接受訪問時被問夠唔夠膽玩機動遊戲，佢話：「我先生（丁子高）最鍾意，之前去新加坡旅行，佢叫工人姐姐陪佢一齊玩，因為我畏高。我覺得個仔會玩，唔驚，佢只係唔夠高，有遺傳因子。」千嬅話當時要負責睇住7個袋同小朋友，有人要求合照都要婉拒。千嬅又自爆未結婚前同丁生喺美國玩過機動遊戲，不過chok親條頸，影嘅相仲好似骨折咁，佢話：「玩過山車叫到把聲爛晒。」千嬅笑言如果有人肯捐一百幾十萬，佢會考慮義玩機動遊戲，因為佢啲恐懼好值錢，但玩之前要先飲半支香檳壯膽。
周柏豪話雖然畏高但都要挑戰自己去試玩，佢話：「其實我都怕血、怕曱甴、怕凍、怕熱。」柏豪話好在女友唔驚小強，仲可以一手捉住。講到千嬅表示要飲半支香檳先敢玩機動遊戲，柏豪話：「都係一個好方法，但我未必，因為飲完半支我都未必上到去。」
撰文：馮仁昭
