剛戰有一啲弱勢騎練打破悶局，取得頭馬，好像原本都處於龍虎榜包尾嘅黎海榮及李易達組合，夾手夾腳勝出「駕善」，算係久旱逢甘露。另外，原本已經兩個半月冇馬贏嘅小將吳嘉晉，更加突然神勇，爆得79倍馬「萬事勇」，捧走其士盃，多多少少令師傅告東尼重拾對佢嘅信心。
其實弱勢騎練，又何止上述三人，孫達志馬房自10月18日勝出「名駒」後，已經10個賽日冇進賬，大家都知老孫已試過兩季成績肥佬，今季再贏唔夠15win就冇牌。家陣佢有5場頭馬，唔算極差，養馬34匹，亦好過只得4Win而養馬僅22匹嘅胡森，屬於「深切治療但有得救」嘅練馬師，相信佢亦唔會放棄。
咁今期孫廐馬中，有冇值得留意呢？其實都有喎。第一場「盈喜悅」季初仲喺賢廐時，曾力拼「有情風」僅敗入Q，「有情風」之後兩戰全勝包括贏四班賽。「盈喜悅」加盟孫廐後已熱身兩仗，相信老孫已大致摸熟佢嘅脾性，今次出王牌，再戰谷草1000米，只喺五班孭121磅，呢啲機會正係屬於老孫嘅！