財政司司長曾俊華憑住同香港人走在一線，夠膽公開撐港隊而人氣持續飆升，風頭蓋過正印特首梁振英，好多人都希望鬍鬚曾做下任禮賓府新主人；𠵱家梗係冇人會知港人呢個「夢想」會唔會實現，但鬍鬚曾做定熱身等入閘都唔算遲，最近佢同年輕人分享做領導嘅心得，覺得最重要係懂得協調，係咪意有所指？
恒生管理學院同新城電台合作嘅「校長與領袖同『恒』」對談節目，上周六由鬍鬚曾任壓軸嘉賓。番書仔鬍鬚曾先嚟軟銷一番，話自己13歲讀完中二就舉家移民美國，作為新移民，好努力地融入當地生活，雖然當年紐約唐人街品流複雜，慶幸自己無走上歪路。
稱厭倦中產生活回流
佢話大學畢業後曾經喺波士頓做耆英會嘅義工，唔只要為老人家送餐，仲要負責洗地、買菜同洗碗，甚至運用自己嘅建築知識為耆英會建造一所醫療所，好多設備都係佢一手一腳做出嚟，徹底體驗何謂「服務學習」嘅精神喎。
點解好好地要回流考入政府？鬍鬚曾嚟料嘞，佢話與其喺外國過着安逸平淡嘅中產生活，倒不如做自己更喜歡以及更具意義嘅事，所以1982年回港迎接新挑戰。至於係咪願意接受更大挑戰，更上一層樓任特區話事人？鬍鬚曾冇正面回應，只稱冇諗過呢個問題喎，但強調只要係自己鍾意嘅事就會一直做落去。
佢同時喺回應出色領袖需要具備乜嘢條件時，意有所指咁噃，佢話領導層最重要係懂得協調、要有辨別事情嘅原則性等，而領袖除咗專業知識，通才至為關鍵。盛傳將鬍鬚曾視為連任最大勁敵嘅特首梁振英，協調各界能力認真麻麻，分化能力就一流，唔知鬍鬚曾係咪都睇到呢一點？
李八方
mailto:[email protected]