渣打馬拉松下年1月舉行，仲升級咗做「金級」賽事，同東京硂波士頓睇齊。跑手喺賽道上面成為焦點，有賴一班義工付出，其中今年56歲嘅楊鴻波話，多年嚟見到香港人為參加比賽出盡茅招，但佢話明白「大家都係想參與盛事啫」。
報唔到名 製假號碼布
因為一次機緣做咗義工嘅楊鴻波，一做就做咗18年，佢笑言香港人「好有智慧」，唔少人報唔到名都會到場，用盡方法想參與其中，「有啲人會擒鐵絲網硂擒欄杆，有啲就會黐住上年嘅號碼布，有手畫，影印嘅都有」，咁多年佢已煉成金睛火眼，一眼就搵到違規人士。做義工除咗見證跑手完成賽事，仲遇到唔少困難，俾跑手投訴都要保持耐性，慢慢解釋。楊鴻波就遇過唔少人過咗起跑時間先到，根據賽例禁止佢哋參賽但就俾人投訴，「啲人唔諒解，但冇諗過如果個個都遲到，咁條路就唔可以準時重開」。
第一屆渣馬喺1997年舉辦，參加嘅人由第一屆約1,000人，到下屆接近7萬人。今年58歲，由第一屆就開始做義工嘅陳仲雨本身都有參加外國馬拉松，但喺香港就只係做義工，「比賽係一個人嘅事，但做義工就可以幫到幾萬人」。