財金界好似越來越多人鍾意運動。瑞信香港認股證及牛熊證銷售主管何啟聰（Ivan）原來都係跑得之人。
保良局上周六喺北潭涌渡假營舉行首屆慈善跑，贊助之一嘅香港股票分析師協會搵咗唔少財金界好友一齊玩，其中Ivan唔使13分鐘，跑完3公里體驗賽奪冠。
Ivan今年初首度參加渣馬，跑完10公里賽後就愛上長跑，年內已參加6個本地長跑賽，上周六跑完保良局慈善跑，周日再玩埋UNICEF喺迪士尼嘅10公里慈善跑，明年渣馬亦會再戰10公里。
佢好謙咁話，好多跑得快過佢嘅朋友上周六冇落場，佢先至有機會拎到冠軍。雖然佢熱愛跑步，可惜工作忙，又唔夠時間練習，佢話，希望將來可以挑戰半馬或全馬，一步步來咁話。