天地有正氣，點解阿仙奴逢喺11月份就黑到痹？兵工廠以往喺英超11月份平均每場得分係1.6分，到今季表現仲低過呢個水平，周日作客諾域治被逼和1:1後，今個月三場聯賽只係得二和一負，最慘情係又添傷兵，守將哥斯尼同進攻主力「山神」阿歷斯山齊士先後傷出，連辛迪卡索拉都傷埋，領隊雲格下場排陣都幾頭痕。
阿仙奴喺11月份已經先後主場賽和熱刺同埋輸畀西布朗，到周日作客下游諾域治，開賽11分鐘先有中堅哥斯尼傷出，到30分鐘中場奧斯爾建功先開紀錄，但完半場前諾域治前鋒加比賓扳平。下半場踢咗15分鐘，到阿歷斯山齊士因拉傷大腿肌肉要被換出，結果兵工廠失分又折將。
10名傷將雲格頭痕
雲格賽後都好無奈，但堅持冇用殘啲球員：「球員嘅職責就係落場踢波，而唔係傳媒話你應該唞吓就唔使踢；暫時我都唔清楚山齊士嘅傷勢。」加埋喺今場波都受傷嘅中場老將辛迪卡索拉，兵工廠𠵱家加埋有成至少10個傷兵，周六英超主場迎戰新特蘭，一隊球員真係買少見少。
阿仙奴繼續黑仔，利物浦就繼續順風順水，紅軍喺周日主場迎戰史雲斯，靠占士米拿射入12碼小勝1:0，全取三分之後升上第六位，只係落後榜首曼城六分。另外，前紅軍隊長謝拉特喺周一更加現身米活訓練場，趁美職聯休季期間，同利物浦跟操㖭！