區選過後，各大政黨都檢討選舉部署，尤其啲老將點解咁輕易墮馬？唔少人將之歸咎政治因素，亦有人話係輕敵所致，但同時都好視乎老將係咪有喺地區耕耘。如果一味姓賴而唔自省，選民下屆未必再支持你捲土重來，千祈咪誤會花生友呢番話講畀葛珮帆聽，只係收集咗建制派意見分享吓。有人仲話，梁振英管治先係建制今次不進則退最大關鍵。
有心水清嘅政界中人話呀，區選後有人捧傘兵報捷、亦有人話傘運影響選情，講到雨傘運動極度左右選情，但查實話係傘運、不如話係梁振英上任特首嘅不滿，市民用選票嚟咗一次大宣洩就真，皆因呢場係CY喺2012年上任特首後首場大型選舉，而呢3年唔只政改引發嘅雨傘運動，親疏有別、法治受損、管治不濟，都令中產極多怨言。
事實上喺呢次區選，建制派就喺唔少中產區、即係最不滿CY嘅市民群組中敗陣，就算贏都係險勝；反之屋邨為主、比較多梁粉支持者住嘅基層區，其實建制派戰績唔錯，皆因基層市民都接受政黨派嘢，建制派狂派、CY上場後亦傾向基層，試問點會唔多支持？呢位政界中人話，由此可見呢次選舉其實某程度係對CY嘅一次信心投票，可見中產不滿已經到極點。有泛民主派就擔心，當呢股怨氣藉區選發洩咗後，唔知明年立法會選舉，仲有冇咁大推動力？
花生友
周二、四刊出