唔少銀行都好鼓勵無紙化，無他，慳錢又環保，何樂而不為？花旗香港明年2月起推動電子月結單，客戶只需登記電子月結單服務，就代表停收郵寄月結單，如果所有客戶將戶口與信用卡月結單，全部轉用電子月結單，咁花旗香港每年可以慳番2,000萬張紙，可以為地球保存2,400棵樹木呀。
見到呢兩個數字，都覺得好誇張，一間花旗香港已經砍伐咁多棵樹，全港約有20間零售銀行，加埋砍伐嘅樹木數字咪好驚人？雖則話𠵱家好多銀行都叫客戶轉用電子月結單，但係大家有冇發現，每星期都會收到好多銀行嘅宣傳單張，尤其係貸款優惠單張，好多都係望完即棄，諗起都覺得浪費，強烈建議銀行考慮停止寄發呢類宣傳單張，為環保出多兩分力。