有法律界桂綸鎂之稱嘅大律師容海恩（圖），政界皆見佢近期同新民黨主席葉劉淑儀行得好埋。原來佢今日有壇新搞作，會成立「香港青年˙專業網絡」。簡稱青專網嘅組織，據聞係由一班青年專業人士組成，主要向青年提供創業支援、並為創業青年提供法律等服務，以及同青年加強溝通等，同特區政府主打嘅青年政策啱晒嘴形。
雖則呢位法律界桂綸鎂喺政界唔算好有名，卻請到唔少知名人士出席成立典禮；除咗葉劉同創新及科技局局長楊偉雄大駕光臨，建制圈子內嘅富二代紅人蔡加讚，以及全國政協委員兼廠商會前會長施榮懷等，據知都會現身恭賀。較令人意外嘅係人權大狀、資深大律師潘熙都到場，可能因為容海恩都係出身城大法律系，師兄專誠捧小師妹場。