有官司在身嘅前特首曾蔭權，無礙佢同朋友見面嘅心情，八方同事噚日就喺中環，見到煲呔同太太曾鮑笑薇同和黃前大班馬世民（Simon Murray）飯局敍舊，馬世民仲力撐煲呔㖭呀。
嘆意菜 微笑封嘴
噚日lunch time，馬世民相約煲呔夫婦喺中環舊中銀樓上嘅意大利餐廳Cipriani食晏，三人離開時同八方同事撞到正。
煲呔夫婦都有啲錯愕，但態度友善，雖然乜都唔答，卻一直保持微笑。馬世民就拉住佢哋嚟張大合照，煲呔夫婦隨後喺兩名G4人員保護下坐車離開。
馬世民話呀，同煲呔相識40年，形容對方係lovely guy，係繼渣打前主席戴維思及前政務司司長陳方安生外，近期開腔力撐煲呔嘅政商界中人。